Skólavarða á Vaðlaheiði

Skólavarða er efst á Vaðlaheiði, sunnan Veigastaðavatns. Varðan var hlaðin um 1930 af nemendum Menntaskólans á Akureyri. Falleg og vinsæl gönguleið liggur að Skólavörðu en þaðan er mikið útsýni yfir Eyjafjörð og Akureyri handan fjarðar. Gangan hefst skammt fyrir ofan gatnamótin á Veigastaðavegi og gamla Vaðlaheiðavegi en þar er skilti merkt Skólavarða við veginn og hægt að leggja bílum í vegarkantinum. Sé fólk á fjórhjóladrifsbíl er hægt að keyra fyrstu 2-300 metrana eftir grófum slóða og þar sem hann endar er annað skilti. Leiðin upp að skólavörðunni er stikuð og fremur auðveld yfirferðar en þó nokkuð brött og blaut á köflum. Bröttustu kaflarnir eru fljótlega eftir að gangan hefst þar sem krækt er suður fyrir svokallaða Veigastaðakletta og síðan er brattur en stuttur kafli upp á há heiðina, skömmu áður en komið er að vörðunni.