Vífilsstaðarvatn

Vífilstaðavatn er ákaflega fallegur staður sem liggur undir Vífilstaðahlíð, sunnan við Vífilstaðaspítala. Fjölbreytt flóra og fuglalíf er að finna á svæðinu og er Vífilsstaðavatn og nágrenni friðlýst svæði frá 2007. Góð aðstaða hefur verið byggð upp í kringum vatnið, bekkir eru víða, fræðsluskilti og þakskýli sem er við bílastæðið. Á hverjum degi er mikið líf við vatnið enda er gönguhringurinn í kringum vatnið ákaflega vinsæl hlaupa- og gönguleið. Á vorin fer að sjást til veiðimanna með flugustangir enda er vatnið tilvalið til að æfa fluguköst fyrir komandi sumar en bleikja og stöku urriði veiðist í vatninu. Fjöldi göngustíga er um svæðið sem gaman er að fara um og við Vífilstaði er að finna frisbígolfvöll.